Kamati ya lishe yasisitiza utoaji chakula shuleni

Wajumbe wa Kamati ya Lishe Halmashauri ya Manispaa ya Ilemela,wamesisitiza juhudi zaidi zifanyike za kuhakikisha shule zote zinatekeleza mpango wa chakula shuleni.

Hayo yamebainishwa wakati Kamati ya Lishe ya halmashauri hiyo iliopo kutana na kujadili taarifa ya utekelezaji wa shughuli za lishe katika Halmashauri ya Manispaa ya Ilemela.

Pia kuhakikisha kuwa chakula kinachotolewa kiwe ni kile kilichoongezwa virutubishi ili kuboresha afya za wanafunzi.

Awali kupitia kamati hiyo ya lishe, iliwasilishwa taarifa ya utekelezaji wa mpango wa chakula shuleni ambapo Mkuu wa Divisheni ya Elimu Msingi na Awali Mwalimu Busungu, akiwasilisha taarifa ya utoaji chakula kwa shule za msingi Ilemela amesema kuwa hadi kipindi hiki jumla ya shule 52 kati ya 76 za serikali zimeanza kutoa lishe shuleni.

Hivyo ameahidi kuwa hadi kufikia mwisho wa mwezi wa Mei shule zote zitatoa lishe,kwa upande wa elimu sekondari Mwalimu Sylvester Mrimi amesema kuwa jumla ya shule 10 kati ya 32 za serikali zinatoa chakula.

Baadhi ya shughuli ni pamoja na kutoa elimu ya lishe kwa wazazi/walezi katika Kata tatu za Nyamh’ongolo, Bugogwa na Ilemela, usimamizi shirikishi pamoja na uhakiki wa ubora wa takwimu za viashiria vya lishe kwa vituo vya kutolea huduma za afya ya mama na mtoto.

Taarifa juu ya kadi alama ya lishe ikiwa na viashiria 12 ambavyo vinatumika kufuatilia utekelezaji wa afua za lishe iliwasilishwa ambapo wajumbe kwa pamoja walikubaliana kuwa nguvu zaidi iongezwe katika utoaji elimu ya lishe kwa jamii ya Ilemela.