Mafunzo yaimarisha huduma za chanjo

Na Mwandishi wetu, Timesmajira online

KATIKA hatua ya kuendelea kuboresha huduma za afya ya jamii nchini, Wizara ya afya imeendesha mafunzo maalum kwa maafisa wauguzi wasaidizi kutoka zahanati, vituo vya afya na hospitali za wilaya ya Moshi, yakilenga kuongeza ufanisi katika utoaji wa chanjo na elimu ya afya kwa wananchi.

Mafunzo hayo yamefunguliwa na Mganga Mkuu wa Wilaya ya Moshi, Dkt. Juma Mombokaleo, ambaye amesema serikali inaendelea kuwekeza katika kuwajengea uwezo watumishi wa afya ili kuhakikisha wananchi wanapata huduma bora, salama na zinazozingatia viwango vya kitaalamu kuanzia ngazi ya jamii.

Kwa mujibu wa takwimu za wizara ya afya, huduma za chanjo zimeendelea kusaidia kupunguza magonjwa yanayozuilika kwa chanjo kama surua, kifua kikuu na polio, huku wataalamu wa afya wakitajwa kuwa nguzo muhimu katika kufikisha huduma hizo kwa wananchi hususan maeneo ya vijijini. Mafunzo hayo yanatajwa kuwa sehemu ya mkakati wa taifa wa kuimarisha huduma za kinga nchini.

Akizungumza wakati wa ufunguzi wa mafunzo hayo, Dkt. Mombokaleo amesema wahudumu wa afya wanapaswa kutumia mafunzo hayo kuongeza weledi, uwajibikaji na ubora wa huduma wanazotoa kwa wananchi ili kuendelea kujenga imani ya jamii katika huduma za chanjo.

“Ninawasihi mkatumie mafunzo haya kuongeza weledi, uwajibikaji na ubora wa huduma mnazozitoa kwa wananchi kwani huduma bora za chanjo ni msingi muhimu wa afya ya jamii,” amesema Dkt. Mombokaleo.

Aidha, amesema serikali kupitia wizara ya afya itaendelea kuweka mkazo katika kuwajengea uwezo watumishi wa afya ili kuimarisha huduma za kinga na tiba, huku elimu ya afya ikiendelea kutolewa kwa wananchi kuhusu umuhimu wa chanjo katika kujikinga dhidi ya magonjwa mbalimbali.

Kwa upande wao, washiriki wa mafunzo hayo wameeleza kuwa elimu waliyoipata itasaidia kuongeza ubora wa huduma katika vituo vya kutolea huduma za afya.

Afisa Muuguzi Msaidizi Fredrick Elisante amesema mafunzo hayo yamewapa maarifa mapya yatakayowawezesha kutoa huduma za chanjo kwa ufanisi zaidi pamoja na kuwafikia wananchi wengi kwa elimu ya afya, huku Dorica Nkemba akisema mafunzo hayo yatasaidia kupunguza changamoto zinazoweza kujitokeza katika utoaji wa chanjo na usimamizi wa huduma za afya ya jamii.