Wanachama 826 wa PSSSF wamehudumiwa kufikia Julai 10 Maonesho ya Sabasaba

Na Mwandishi Wetu, TimesMajira Online, Sabasaba

MKURUGENZI Mkuu wa Mfuko wa Hifadhi ya Jamii kwa Watumisi wa Umma (PSSSF) CPA. Hosea  Kashimba amesema zaidi ya wanachama wapatao 826 wamehudumiwa na PSSSF kwenye maonesho ya 44 ya biashara ya kimataifa ya Dar es Salaam tangu yalipoanza Julai 1 hadi leo Julai 10, 2020.

Kashimba ameyasema hayo leo Julai 10, 2020 wakati alipotembelea viwanja vya Julius Nyerere maarufu Sabasaba barabara ya Kilwa jijini Dar es Salaam ambako ndiko kunakofanyika maonesho hayo yaliyopewa kauli mbiu isemayo “Viwanda kwa Ajira na Biashara Endelevu.

“Tuko katika banda namba 13 tuliloliandaa kwa ushirikiano na NSSSF kwa lengo la kutoa huduma bora kwa wanachama wetu, tunatarajia tutaendelea kuwahudumia wanachama zaidi hadi hapo maonesho yatakapofikia kilele chake, tunawakaribisha wanachama wetu na wananchi kwa ujumla. Hapa sabasaba tuna ofisi kamili .” Amesema Kashimba.

Amesema huduma zote zinazotolewa kwenye ofisi za PSSSF zilizoeneo nchi nzima zinapatikana kwenye banda hilo na kuwahimiza wanachama na wananchi kufika ili wahudumiwe.

“Mwanachama atapata huduma zote kama anataka kupata ufafanuzi kuhusiana na uanachama wake, kuhakiki taarifa zake, kuangalia michango yake na mambo yote yanayohusiana na uanachama huduma zinapatikana hapa.” Alisisitiza.