Dkt.Mabula ataka kasi mpya maendeleo Tabora

Na Mwandishi Wetu, TimesMajira Online,Tabora

MKUU wa Mkoa wa Tabora Dkt.Angeline Mabula ameeleza  kuwa anataka kuona mkoa huo ukipiga hatua  zaidi kimaendeleo huku kila mtumishi akitimiza wajibu wake ipasavyo.

Dkt.Mabula ameeleza hayo wakati akizungumza  na Wakuu wa Wilaya, Wakurugenzi wa Halmashauri, Wakuu wa Taasisi, Sekretarieti ya Mkoa, Wajumbe wa Kamati ya Ulinzi na Usalama ya Mkoa, Makatibu Tawala wa Wilaya na Maofisa Tarafa.

Amesema mkoa huo ni miongoni mwa mikoa yenye fursa nyingi za kiuchumi, lakini utekelezaji wake hauridhishi licha ya jitihada zinazofanyika, hivyo alisisitiza kuwa anataka kuona Tabora ikienda kwa kasi zaidi.

Ametaja baadhi ya fursa hizo kuwa ni maeneo ya uwekezaji viwanda, bwawa la Wembele, eneo la ujenzi wa bandari kavu,ujenzi wa Chuo Kikuu cha Kilimo unaoendelea sasa na nyinginezo.

“Najua baadhi ya mipango utekelezaji unaendelea, ila kasi yake hairidhishi, na hili ndilo nalotaka lifanyike.Nataka Tabora iende kwa kasi kubwa zaidi,kila mmoja asimame kwenye zamu yake,”amesema Dkt.Mabula.

Dkt Mabula amesisitiza kuwa watumishi wote kuanzia Ofisi ya Mkuu wa Mkoa hadi wilayani wanatakiwa kufanya kazi kwa nidhamu na mshikamano huku kila mmoja atimize wajibu wake ipasavyo.

“Tutumie muda wetu vizuri kwa kufanya kazi inayotakiwa na sio kuendekeza malumbano au majungu, tukosoane vizuri ili kujenga na kudumisha ushirikiano wetu, sitapokea majungu yoyote ofisini kwangu,”.

Pia  ameeleza kuwa ofisi yake ipo kwa ajili ya wananchi, hakuna haja ya ‘appoitment’, na kuonya kuwa mwananchi atakayeleta malalamiko ya kutosaidiwa na mtumishi yeyote wakiwemo Wakuu wa Wilaya, ataeleza kwa nini hakumsaidia.

Aidha ameagiza fedha zote zinazoletwa na Serikali au wadau wa maendeleo kwa ajili ya shughuli za maendeleo zisimamiwe ipasavyo na taarifa ya matumizi yake ipatikane wakati wote na kazi iliyofanyika ionekane, kinyume na hapo, itakula kwao.

Awali Katibu Tawala  Mkoa wa Tabora Dkt.John Mboya ameeleza kuwa Serikali Kuu imeleta zaidi ya sh.bilioni 96 za maendeleo katika mkoa huo, ambapo bil 8.2 ni kwa Ofisi ya Mkuu wa Mkoa na bil 88.8 za halmashauri.