QNET yakanusha kuwalaghai vijana 125 Singida

Na Mwandishi Wetu,TimesMajira

KAMPUNI ya kimataifa ya QNET imekanusha taarifa iliyotolewa na moja ya chombo cha habari nchini kudai kuwa kampuni imewalaghai vijana 125 kutoka mikoa 11 nchini, waliodaiwa kushawishiwa kutoa fedha kwa ahadi za ajira na mafanikio ya haraka ya kifedha mkoani Singida.

Taarifa iliyotolewa leo kwa vyombo vya habari na Meneja Mkuu wa Kanda ya Afrika Mashariki na Kusini wa QNET, Jared Thwaits,imesema watu wanaodaiwa kuendesha shughuli hizo kwa kutumia jina la Kampuni yao si wasambazaji Huru waliosajiliwa na QNET, hivyo haina uhusiano rasmi nao.

Amesema wamesikitishwa na taarifa za vyombo vya habari kuhusu tukio hilo, hasa kutokana na athari zinazoweza kuwakumba vijana hao na familia zao, huku ikilaani vitendo vya udanganyifu na unyonyaji wa kifedha vinavyodaiwa kufanyika.

Kwa mujibu wa taarifa zilizoripotiwa na moja ya kituo cha televishion, vijana hao wanadaiwa kushawishiwa kutoa fedha baada ya kuahidiwa nafasi za ajira na mafanikio ya haraka ya kifedha. Baadhi yao pia wanadaiwa kuishi katika mazingira yasiyofaa, hali iliyosababisha mamlaka za eneo hilo kuingilia kati.

Thwaits, amesema kampuni hiyo inasikitishwa na matumizi ya jina lake katika shughuli zinazodaiwa kwenda kinyume na maadili na taratibu zake za biashara.

Amesema kwa zaidi ya miaka 28, QNET imekuwa ikiendesha biashara katika masoko mbalimbali duniani, hivyo ni muhimu kubaini watu waliohusika na tukio hilo, uhusiano wao na kampuni pamoja na iwapo walikuwa na mamlaka ya kuiwakilisha.

“Ni lazima tubaini nani anahusika, uhusiano wao halisi ni upi, na kama walikuwa wameidhinishwa kuiwakilisha kampuni. Madai ya vitendo visivyo halali lazima yafanyiwe uchunguzi wa kina, na uwajibikaji unapaswa kutegemea ukweli uliothibitishwa,” amesema Thwaits.

Ameongeza kuwa kampuni hiyo inapinga vitendo vya udanganyifu na upotoshaji wa mfumo wake wa biashara, akisisitiza kuwa shughuli hizo haziendani na dhamira yake ya kukuza ujasiriamali unaozingatia maadili.

Amesema kuwa mfumo wake wa biashara unategemea mauzo ya bidhaa kupitia Wasambazaji Huru na si uuzaji wa nafasi za ajira au kuahidi watu mapato ya uhakika.

Aidha, amesema kampuni hiyo haitoi ajira kwa malipo ya ada za usajili wala kuruhusu mtu yeyote kukusanya fedha kwa kutumia ahadi za ajira au utajiri wa haraka.

Amesema wapo tayari kushirikiana na mamlaka husika katika uchunguzi wa tukio hilo ili kusaidia kubaini ukweli na kuhakikisha hatua stahiki zinachukuliwa dhidi ya waliohusika.

Pia, amewahimiza wananchi kuthibitisha uhalali wa fursa zinazotolewa na watu wanaojitambulisha kuwa wawakilishi wake kupitia njia rasmi za mawasiliano kabla ya kufanya malipo au kuingia katika makubaliano yoyote ya kibiashara.naomba uniwekee headline