Muheza yapitisha bajeti ya Bilioni 41. 24 katika mwaka wa fedha 2022/23

Na Hadija Bagasha, TimesMajira Online, Muheza

Halmashauri ya Wilaya ya Muheza Mkoani Tanga imepitisha bajeti ya Sh Bilioni 41. 24 kwa mwaka ujao wa fedha (2022/23) ikionyesha ongezeko la Sh Bilioni 4.67 ikilinganishwa na makadirio yanayoishia Juni mwaka huu.

Akitoa maelezo kuhusu bajeti hiyo, wakati wa kikao cha, baraza la madiwani wa, halmashauri hiyo Mkurugenzi Mtendaji wa Halmashauri ya Wilaya ya Muheza (DED), Nassib Mmbaga aliweka wazi namna watakavyoweza kukusanya mapato yao kupitia vyanzo vya ndani vya mapato wilayani humo.

Mkurugenzi Mmbaga alisema kuwa wilaya hiyo inatarajia kutumia Sh bilioni 9.67 kwa ajili ya utekelezaji wa miradi ya maendeleo inayojumuisha ujenzi au ukamilishaji wa vyumba vya madarasa katika shule za msingi na sekondari, maabara za sayansi na ujenzi wa vituo vya afya na ununuzi wa dawa na vifaa kwa ajili ya vituo vya afya na Hospitali ya Wilaya.

Mmbaga alikiambia kikao cha Baraza la Madiwani cha bajeti kilichofanyika mjini Muheza kuwa sehemu kubwa ya bajeti hiyo itajumuisha fedha kutoka Serikali kuu.

Alisema kuwa Halmashauri inatarajia kupokea Sh 38.70 kutoka Serikali Kuu kwa ajili ya mishahara na mishahara, matumizi mengineyo na kwa ajili ya kutekeleza miradi ya maendeleo. Kiasi kinachoonyesha ongezeko la zaidi ya Sh bilioni 15.6 kulinganisha na mwaka wa fedha 2021/22.

Akizungumzia makusanyo ya mapato kutoka vyanzo vya ndani, alisema kuwa wilaya hiyo imependekeza kukusanya Sh bilioni 2.24 kwa mwaka ujao wa fedha ambazo ni upungufu wa Sh milioni 209. kutoka bajeti ya mwaka uliopita.

Akielezea utekelezaji wa mapendekezo ya bajeti ya mwaka huu wa fedha, alisema kuwa halmashauri hiyo hadi sasa imekusanya asilimia 61 (Sh Bilioni 1.4) ya makusanyo ya ndani ya bajeti iliyoidhinishwa kwa mwaka huu.

Baraza pia limepokea asilimia 55 (au Sh Bilioni 17.40) ya fedha iliyoidhinishwa na Serikali Kuu kufikia Desemba, mwaka jana.

Kiasi kilichopokelewa kinajumuisha Sh Bilioni 4.01 (au asilimia 39 ya kiasi kilichoidhinishwa kwa ajili ya miradi ya maendeleo kwa mwaka huu) kwa ajili ya utekelezaji wa miradi ya maendeleo.

Awali akisoma mapendekezo ya mpango na bajeti ya Halmashauri ya wilaya hiyo kwa mwaka 2022/23 ofisa mipango wa halmashauri hiyo Pascal Temba alisema bajeti hiyo imegawanyika katika sehemu mbili ikiwemo mapitio ya mpango wa bajeti 2021/22kuishia Desemba na sehemu ya pili ni mpango na makisio ya bajeti kwa mwaka 2022/23.

Alisema eneo la kwanza ambalo ni mapitio kwa mwaka 2022/23 kuishia Desemba 2021/22 kuishia Desemba Halmashauri ya Muheza kwa kipindi cha mwaka 2021/22 ilikisia kupokea ruzuku na kukusanya katika vyanzo vyake vya ndani jumla ya shilingi bilioni 36.572.

Wakati huo huo, uhaba wa fedha kwa ajili ya utekelezaji wa miradi ya barabara umetajwa na Meneja wa Wakala wa barabara Vijijini (TARURA) Wilaya ya Muheza, Kahoza Joseph kuwa unapunguza uwezo wa wakala huo kutekeleza miradi ya barabara iliyoidhinishwa kwa mwaka huo wilayani humo.

Kahoza alisema TARURA Ilipokea Sh million 496 kwa ajili ya utekelezaji wa miradi ya barabara iliyoidhinishwa ambayo alisema ni asilimia 34 tu ya fedha zilizowekwa kwa mwaka huu wa fedha wa Sh Bilioni 2.9.

Alisema kuwa wakala huo hauwezi kutekeleza miradi yote ya barabara iliyoidhinishwa kwa kutumia fedha walizokuwa wakipata kwa mwaka mmoja na wanatakiwa kufanya katika mzunguko wa miaka mitatu.

Aliiomba Halmashauri kutenga Sh milioni tatu kwa kila kata kwa ajili ya kusaidia kutekeleza miradi ya barabara katika kata husika,hususan akitaja utekelezaji wa miradi mipya ya barabara.

Aidha Kahoza alisema shirika hilo linakabiliwa na upungufu mkubwa wa wafanyakazi akisema lina wafanyakazi 5 tu kati ya 18 wanaohitajika.