Mchechu:Tumeongeza ukusanyaji mapato yasiyo ya kodi kwa asilimia 40

Na Heri Shaaban,Timesmajiraonline,Dar

MSAJILI wa Hazina Nehemiah Mchechu, amesema wameongeza asilimia 40 katika makusanyo ya mapato yasiyo ya kodi ndani ya kipindi cha miezi 11, ikilinganishwa na kipindi kama hicho katika mwaka wa fedha uliopita.

Akizungumza katika kikao na wahariri wa vyombo vya habari jijini leo,Juni 4,2025  Mchechu,amesema serikali imekusanya Shilingi bil.884.7 kuanzia Julai 2024 hadi Mei 2025.

Mchechu amesema ni ongezeko kubwa la mapato yanayokusanywa kutoka taasisi za umma na kampuni ambazo serikali ina umiliki wa hisa chache, ikilinganishwa na Shilingi bil.633.3 zilizokusanywa katika kipindi kama hicho cha mwaka wa fedha 2023/24.

“Hii inaonesha ongezeko la asilimia 15.3 ikilinganishwa na jumla ya makusanyo ya mwaka mzima ya Sh.bil 767 katika mwaka wa fedha uliopita,”amesema.

Mchechu amesema ukuaji huo wa mapato umetokana na kuimarishwa kwa utaratibu wa ufuatiliaji wa karibu wa gawio na michango katika Mashirika ya umma na matumizi ya Mifumo ya TEHAMA.

Ofisi imefanikiwa kuunganisha Mfumo wa Mpango na Bajeti (PlanRep) na Mifumo ya ERMS na e-Watumishi pamoja na kufanya maboresho ya Mfumo wa MUSE ambao unawezesha kupata taarifa halisi za matumizi katika Taasisi na Mashirika ya Umma ili kuongeza uwazi na uwajibikaji katika usimamizi wa fedha za Umma.

Amesema maboresho hayo sasa yamefanya mifumo kubadilishana taarifa ipasavyo ikiwa ni sehemu ya utekelezaji wa agizo la Rais Dkt.Samia Suluhu Hassan aliyetaka kuona mifumo inasomana.

Akivitaja vyanzo vikuu vya mapato kwa mwaka huu amesema ni gawio ambalo limechangia asilimia 63.9 ya mapato yote, huku michango ya asilimia 15 ya mapato ghafi ikichangia asilimia 29.7.

Aidha, mapato mengineyo yaliyojumuisha ziada, marejesho ya mikopo na riba pamoja na Mawasilisho yatokanayo na mtambo wa kuhakiki na kuwezesha mawasiliano (TTMS) yamechangia asilimia 6.4 ya mapato yote.