Balozi Nchimbi aongoza ujumbe wa CCM kwenye ziara nchini Ethiopia

Na Agnes Alcardo, Timesmajira Online

KATIBU Mkuu wa Chama Cha Mapinduzi (CCM), Balozi Dkt. Emmanuel Nchimbi, ameuongoza ujumbe wa CCM katika ziara ya kikazi nchini Ethiopia kuanzia Januari 29 hadi 31, 2025. Kufuatia mualiko wa Chama tawala cha nchini humo, Prosperity Party.

Ziara hiyo inajumuisha ushiriki wa Balozi Nchimbi katika mkutano mkuu wa pili wa Prosperity Party, pamoja na juhudi za kuimarisha uhusiano kati ya Ethiopia na Tanzania, kupitia vyama hivyo viwili vinavyoongoza Serikali katika nchi hizo.

Pia, ziara hiyo inalenga kuimarisha ushirikiano wa diplomasia ya uchumi kati ya Ethiopia na Tanzania, uhusiano ambao ulijengwa miaka minginiliyopita kwa misingi imara ya kisiasa, wakati wa harakati za kuikomboa Afrika.

Mazungumzo kati ya Balozi Nchimbi na viongozi waandamizi wa Prosperity Party, yatahusisha mikakati ya maendeleo na yenye manufaa kwa pande zote mbili, hususani katika Sekta ya Uwekezaji, Biashara, Ufugaji na Teknolojia, ambapo Februari Mosi, 2025, Balozi Nchimbi atakuwa amerejea nchini Tanzania.