Makada 125 CCM wavaana majimbo ya Ngara, Nkenge, Biharamulo

Na Allawi Kaboyo TimesMajira Online, Biharamulo.

KASI ya uchukuaji fomu na urejesha za kugombea ubunge na udiwani kwa wanachama wa CCM katika Jimbo la Biharamulo inazidi kuongezeka, ambapo wagombea wamefikia 40 kati yao wanawake ni saba. Hadi jana siku ya pili ya uchukuaji fomu wana CCM 125 walikuwa wamejitokeza kuwania ubunge katika majimbo ya Ngara, Nkenge na Biharamulo, mkoani Kagera.

Katibu wa CCM wilaya ya Biharamulo, Adia Rashid Mamu, amewaambia waandishi wa habari jana kuwa zoezi la uchukuaji fomu linaendelea vizuri.

Amesema wananchama katika wilaya hiyo wamehamasika na kujitokeza kutekeleza haki yao ya kikatiba kama wananchama na kuongeza kuwa hamasa hiyo inatokana na mambo makubwa yaliyofanywa na Serikali ambayo ipo chini ya chama chao ikiongozwa na Rais John Magufuli.

Amesema uchukuaji wa fomu za ubunge umegusa rika zote, huku akionesha kufurahishwa na wingi wa wananwake waliojitokeza kugombea jimbo hilo pamoja na vijana na kuwataka watia nia hao kufuata kanuni na taratibu za chama.

Kiongozi huyo amesema licha ya idadi hiyo kuwa kubwa mbunge aliyemaliza muda wake bado hajajitokeza kuchukua fomu.

“Mwenendo wa uchukuaji fomu za kugombea hapa kwetu unakwenda vizuri na wanachama wamehamasika kwa wingi kuchukua fomu, kinachonifurahisha zaidi ni kuona wanawake na vijana wamejitokeza hili linaashiria kuwa ndani ya chama chetu demokrasia imetawala na kuonesha kuwa uongozi sio wa watu fulani.

Niwaombe wananchama waendelee kujitokeza kuchukua fomu maana fomu zipo na gharama yake ni sh.100,000 mgombea anaweza pia kutoa mchango wa hiari kwa ajili ya kuchangia chama katika mchakato mzima wa kampeni.” Amesema Adia

Aidha katibu huyo amesema kuwa maandalizi kuelekea kwenye kura za maoni yapo vizuri ambapo amebainisha kuwa katika wilaya hiyo wapo zaidi ya wajumbe 600 ambao wote wanatarajia kushiriki kikamilifu uchaguzi huo ndani ya Chama na hatimaye wakampata mgombea atakayepeperusha bendera ya CCM katika uchaguzi mkuu utakaofanyika mwezi oktoba mwaka huu.

Nje ya ofisi hiyo walikuwepo baadhi ya watia nia ambao walikuwa wananendelea kuchukua fomu na wengine wakirudisha fomu ambao miongoni mwa wagombea hao ni Mhandisi Ezra Chiwelesa ambaye amefika ofisini hapo kurejesha fomu na kuwaeleza waandishi wa habari kuwa yeye kama

kijana ameamua kugombea ubunge ili kuwatumikia wana Biharamulo.

Ezra ameongeza kuwa mfumo uliopo ndani ya chama chao unaweka uhuru wa kila mwananchama kugombea hivyo ameamua kuja Biharamulo kuweza kukabiri baadhi ya changamoto ambazo kwao zimekuwa kero ya muda mrefu kwa wananchi wa wilaya hiyo.

“Nimeamua kuchukua fomu ya kuomba kugombea nafasi ya ubunge kupitia chama changu nikiamini mimi naweza kuwatumikia wana Biharamulo, chama chetu sasa ni kipya na mimi nataka Biharamulo yetu iwe mpya na iwe sehemu ya kuwavutia wawekezaji maana tayari tunayo mbuga inayopita kwenye wilaya yetu ya BURIGI CHATO hii ni fursa kwa wananchi wa Biharamulo.” Amesema Mhandisi Ezra.

Ameeleza kuwa katika mchakato wote anawasihi watia nia wenzake kutotumia lugha chafu kwa wagombea wenza na kuwataka wajumbe kutojihusisha na vitendo vya rushwa kwa kushawishiwa na baadhi ya wagombea na kuwapa vijisenti ili wawachague huku wakijua wanatangeneza

mstakabali wa maisha yao ya miaka mitano ijayo.

Mwingine aliyekuwepo ni Idrissa Songoro ambaye naye amejitokeza kuchukua fomu ya kuwania kuteuliwa kugombea ubunge wa jimbo hilo ambapo ameeleza kuwa kutokana na demokrasia iliyopo ndani ya chama anajiona anatosha kuwatumikia wananbiharamulo.

Katika wilaya ya Missenyi waliojitokeza kuchukua fomu za kugombea nafasi ya ubunge wa jimbo la Nkenge wamefikia 46 hadi jana Julai 15,mwaka huu ambapo miongoni mwa watia nia hao wamo waliowahi kuwa wabunge wa jimbo hilo ambao ni Balozi Dkt. Deodorus Kmara mbunge

aliyemaliza Muda wake, Asumputa Mshama aliyekuwa mkuu wa wilaya ya Kibaha mkoani Pwani.

Kwa mujibu wa Katibu wa chama hicho wa wilaya Missenyi, Emanuel Alex ameeleza kuwa miongoni mwa watia nia hao wane kati ya hao ni wananwake huku akizidi kuhamasish wananchama kwenda kuchukua fomu ili waweze kukipigania chama chao.

Aidha kwa upande wa Jimbo la Ngara watia nia waliochukua fomu ya kuwania kuteuliwa kugombea ubunge wa jimbo hilo kupitia CCM wamefikia 39 hadi Julai 15 mwaka huu huku mmoja kati ya hao ni mwanamke.

Kwamujibu wa katibu wa CCM Wilaya ya Ngara Mapanga Nelele amesema kuwa mwenendo wa uchukuaji fomu unakwenda vizuri ambapo ameeleza kuwa miongoni mwa watia nia hao yumo mbunge aliye maliza muda wake, Alex Gashaza ambaye naye amechukua fomu kwa ajili ya kuitetea nafasi yake ambapo ameongeza kuwa waliochukua fomu kuwania udiwani viti maalumu wamefikia 16.

Nelele amewasihi wagombea kuendelea kufuata kanuni na taratibu za chama katika mchakato mzima ili waweze kuenzi katiba ya chama chao na kuwasihi wanachama kuendelea kuzitumia siku zilizobakia kujitokeza kuchukua fomu.