
Na Israel Mwaisaka, Nkasi
UMOJA wa wakuu wa shule za msingi (TAPSHA) wilayani Nkasi mkoani Rukwa umedhamiria kuona suala la upatikanaji wa chakula shuleni kwa mwaka 2027 linafanikiwa kwa asilimia 100.
Akitoa taarifa ya utekezaji wa TAPSHA kwenye mkutano mkuu wa mwaka 2026 Mwenyekiti wa umoja huo Mulinga Joramu amessema suala la upatikanaji wa chakula shuleni limeonyesha mafanikio makubwa katika sekta ya elimu na kuwa jambo hilo limepewa kipaumbele katika kuona chakula shuleni kinapatikana katika shule zote za msingi wilayani Nkasi.
Katika Taarifa hiyo imeonyesha Wilaya Nkasi kufanya vizuri kwenye mtihani wa mwisho wa darasa la Saba kwa mwaka 2026 kimkoa na kuwa moja ya kitu kilichopelekea kuyafikia mafanikio hayo ni pamoja na upatikanaji wa chakula shuleni.
Alidaii kuwa licha ya mafanikio hayo waliyoyapata mwaka huu lakini pia bado wanakabiliwa na changamoto kadhaa ikiwemo uwingi wa Wanafunzi kwenye darasa moja,upungufu wa madawati,uhaba wa Walimu kwa baadhi ya shule,kukosekana kwa vifaa vya Tehama,uhaba wa nyumba za Walimu na zilizopo kutokarabatiwa,kutokuwepo kwa motisha kwa shule zinazofanya vizuri ikiwa ni pamoja na nyingine nyingi.

Akifungua mkutano huo Kaimu mkurugenzi mtendaji wa halmashauri ya wilaya Nkasi Njogela kwanza alipongeza mafanikio makubwa yaliyopatikana kwenye matokeo ya darasa la Saba na kuwataka Walimu wakuu kupitia umoja wao huo kuendelea kusimamia taaluma shuleni ili waendelee kufanya vizuri kwenye mitihani ijayo.
Aliwataka Walimu hao kusimamia suala la upatikanaji wa chakula shuleni kama yalivyo malengo Yao na kuwa katika kufanikisha hilo Serikali ipo pamoja nao pale wanapopata changamoto yoyote katika kufanikisha mpango huo muhimu wa upatikanaji wa chakula shuleni.
Pia aliwataka Walimu wakuu hao kuhakikisha wanawasimamia Walimu wanaowaongoza kuhakikisha wanajaza PEPMIS kwani hayo ni maisha yao kinyume cha hapo watashindwa kupata haki zao za kimsingi ikiwemo upandaji wa madaraja na vyeo.
Alisema kuwa PEPMIS ndiyo kipimo cha utendaji kwa watumishi wa Umma hivyo kitendo cha kupuizia ujazaji wa PEPMIS ni kujinyima haki hivyo ni muhimu kwa Walimu wakuu kuhakikisha Walimu wao wanajaza PEPMIS Kila wakati ili kuweza kuondoa malalamiko kutoka kwao kwa kushindwa kupata haki zao zinazotokana na kutojaza PEPMIS.

Suala la uhaba wa madawati halmashauri imelipa uzito wa aina yake na kupelekea kutenga Fedha kwa ajili ya mpango huo na kuwa wameweza kuzungumza na taasisi kadhaa za serikali ikiwemo TAWA na TFS kuweza kuwapatia kibali Cha kuvuna baadhi ya miti ambayo imedumu kwa muda mrefu ili waweze kupasua mbao zitakazotumika kutengenezea madawati kwa gharama nafuu.
Mkutano mkuu huo wa TAPSHA pia ulienda sambamba na uchaguzi baada ya waliokuwepo kumalizia muhula wao wa miaka mitano na waliochaguliwa ni Alipo Jonas Jimmy Mwenyekiti,Wilson Mrisho Makamu Mwenyekiti, George Mkondya Katibu,Ezekia Kataupepo Katibu msaidizi na Teddy Mbaule Mhazina.


More Stories
Azania kutoa mikopo ya riba nafuu kwa wanawake
Nkasi yazipongeza shule zilizofanya vizuri
Uongezaji thamani Madini kupewa kipaumbele TMIC 2026