Masenza Mwenyekiti JUWAKITA Mwanza 

Na Mwandishi Wetu, Timesmajira Online- Mwanza

AMINA  Masenza amechaguliwa kuwa Mwenyekiti mpya wa Jumuiya ya Wanawake wa Kiislamu Tanzania (JUWAKITA) Mkoa wa Mwanza,kwa kura 25 katika uchaguzi wa viongozi wa jumuiya hiyo, na kupewa dhamana ya kuongoza kwa kipindi cha miaka mitano.

Mkutano mkuu huo wa uchaguzi wa JUWAKITA umefanyika Agosti 16,2026, na kusimamiwa na Naibu Katibu Mkuu (Dini) wa BAKWATA Makao Makuu, Mohamed  Said, akisaidiwa na Mkurugenzi wa Uchaguzi, Ramadhan Chanila, ambaye ni Katibu wa BAKWATA Mkoa wa Mwanza, kwa niaba ya Sheikh Nuhu Mruma.

Katika uchaguzi huo Hadija Liganga amechaguliwa kuwa mjumbe wa mkutano mkuu wa JUWAKITA Taifa baada ya kupata kura 24, akifuatiwa na Sikitu Abubakar aliyepata kura 23 na Fatuma Abdallah Bajber aliyepata kura 21. 

Kwa upande wa wajumbe wa Kamati Kuu ya Mkoa, Aisha  Marzuku,Asha Omar, Asha Juma, Asma Said na Hajat Safina Shaaban walipata kura 25 kila mmoja na kuchaguliwa katika nafasi hizo.

Wajumbe wengine katika kamati kuu hiyo ya Mkoa ni Mwanaidi Hamis aliyepata kura 24, Husna Mganda na Hamida Mwinyikambi waliopata kura 23 kila mmoja, Rahma Juma aliyepata kura 22 na Sharbano Abubakar aliyepata kura 20.

Akizungumza baada ya kutangaza matokeo, Msimamizi wa uchaguzi Mohamed  Said amrsema,washindi wote wanastahili kupewa hati za ushindi, akisisitiza hata ambao kura zao hazikutosha kushinda nafasi walizowania ni sehemu ya JUWAKITA Mwanza na wanapaswa kuendelea kushirikiana. 

Amesema viongozi hao wanapaswa kukaa pamoja na kuchakata mambo mbalimbali yatakayosaidia kuleta maendeleo kwa wanawake na jamii kwa ujumla, huku akiwataka kuweka mbele umoja na ushirikiano katika kipindi cha uongozi wao.

Kwa upande wake  Sheikh wa Mkoa wa Mwanza Hassan Kabeke amewataka,viongozi  hao na wanawake kuwa waangalifu katika matumizi ya maneno na kuepuka kauli zinazoweza kuwaumiza au kuwagawa wenzao,akisisitiza kulinda utu na mshikamano ndani ya jumuiya.

“Tuchunge ndimi zetu tusiseme maneno ya kuwachoma watu,maana utu wa mwanadamu uko ndani ya pango lake yaani kinywani mwake,”amesema Sheikh Kabeke na kuwataka wajumbe wa JUWAKITA kurejea katika shughuli zao wakiwa wamoja huku akisisitiza kuwa BAKWATA ni taasisi inayowaunganisha na kuwapa nafasi ya kushirikiana katika kusimamia masuala ya dini na jamii. 

Sheikh Kabeke amewataka,viongozi hao  kutafuta suluhisho la changamoto zinazowakabili wanawake,akitaja mikopo yenye masharti magumu na rushwa ya ngono, hivyo watafakari namna ya kuwavusha wanawake kiuchumi na kusaidia kukabiliana na mmomonyoko wa maadili kwa watoto na jamii.

Mwenyekiti wa JUWAKITA Amina Masenza amesema,anathamini dhamana waliyopewa hivyo alimuomba Mungu awape busara na hekima katika kuwatumikia wanawake wa Kiislamu,huku akiwasisitiza viongozi wenzake kushirikiana na  kuhakikisha jumuiya hiyo  inakuwa chombo cha kuwainua wanawake na kusaidia jamii.

“Waliotuchagua wametupa dhamana ili tuwahudumie akina mama. Mungu atupe busara na hekima katika kuwatumikia na kuongoza wanawake wa Kiislamu,”amesema Masenza.