Washindi ‘Tap Tap Utoboe’wakabidhiwa zawadi

Na Agnes Alcardo,TimesmajiraOnline,Dar

BENKI ya Exim Tanzania imekabidhi rasmi zawadi kwa washindi wa droo ya mwisho ya kampeni yake ya kidijitali ya ‘Tap Tap Utoboe’ iliyoendeshwa kwa muda wa miezi mitatu.

Washindi hao wamejishindia zawadi ambazo ni gari mpya aina ya Mazda CX-5 kwa mshindi wa kwanza, Bajaj aina ya TVS kwa mshindi wa pili, na pikipiki aina ya boxer BMX kwa mshindi wa tatu, Lengo la kampeni hiyo ilikuwa ni kuhamasisha wateja wa benki ya Exim kufanya miamala yao kwa kutumia simu zao za mkononi na kupitia mtandaoni.

Washindi hao ni Geofrey Muganyizi, Irene Dominick, na Bhavesh Gorecha waliopatikana kupitia droo hiyo kubwa ya mwisho iliyofanyika Makao Makuu ya benki hiyo jijini Dar es Salaam mnamo tarehe 13 mwezi Septemba chini ya usisamizi wa Bodi ya Michezo ya Kubahatisha Tanzania.

Akizungumzia kufurahishwa na zawadi hiyo, Geofrey Muganyizi, ambaye ameibuka kuwa mshindi wa kwanza amesema, “Kiukweli sikuamini kama naweza kushindi gari mpya kwa kufanya miamala yangu kwa simu na mtandao bila kuingia gharama zozote, Maana bahati nasibu zingine hadi utoe kitu ndiyo uwe mshindi lakini hii ya kipekee sana.”

Akizungumza wakati wa makabidhiano hayo, Mkuu wa Kitengo cha Wateja Binafsi na Biashara za Kati wa Benki ya Exim Tanzania, Andrew Lyimo,amesema tangu kuanza kwa kampeni hiyo mwezi Juni, zaidi ya wateja 200 wameshinda zawadi za fedha taslimu ambapo washindi 10 kila wiki walipata zawadi ya Shilingi 50,000 huku washindi 10 kila mwezi wakipata  zawadi ya shilingi 100,000 kwa kipindi chote cha kampeni hii.

“Nitumie fursa hii kuwapongeza washindi wetu wote waliotangulia na zaidi pia niwapongeze washindi wa droo yetu kubwa tuliyoifanya wiki iliyopita, kama tulivyobainisha hapo awali, Muganyizi ambaye ni mshindi wa kwanza atapata gari jipya aina ya Mazda Cx 5 ambapo itakuwa imejazwa mafuta pamoja na bima kubwa ya mwaka mzima buree. Mshindi wa pili, Irene Dominick yeye atapata Bajaj aina ya TVS, na mshindi wa tatu Bhavesh Gorecha atapata pikipiki aina ya Boxer BMX, Zote zikiwa na mafuta pamoja na bima kubwa kwa mwaka mzima,’amesema.

Stanley Kafu, Mkuu wa Kitengo cha Masoko na Mawasiliano wa Benki ya Exim,amesema “Kampeni ya Tap Tap Utoboe imekuwa na matokeo mazuri katika kuongeza uelewa na matumizi ya huduma zetu za kidijitali, “Tumefurahi kuwa wateja wetu wengi wamevutiwa na huduma hii na hili limedhihilishwa na ongezeko la miamala ya kidijitali tangu kampeni hii ianze mpaka sasa hivi hata kama imeisha”. 

Naye Silas Matoi, Mkuu wa Njia Mbadala za Kidijitali wa Exim Bank, ameelezea umuhimu wa ubunifu wa kidijitali kwa benki hiyo. “Ubunifu wa kidijitali ndio kiini cha mkakati wetu wa kuboresha huduma zetu kwa wateja. Kampeni ya Tap Tap Utoboe imeonesha jinsi teknolojia inavyoweza kubadilisha namna ambavyo wateja wetu wanatumia huduma za kifedha. Tumewavutia wateja wapya na wa zamani kwa kuwapa fursa ya kushinda zawadi, huku tukiunga mkono ajenda yetu ya kuendeleza uchumi wa kidijitali,” amesema Silas.

Kampeni ya Tap Tap Utoboe ilikuwa sehemu ya jitihada za Benki ya Exim kuhimiza jamii kufanya miamala kupitia benki.