Wachimbaji wadogo Geita wapatiwa leseni tatu mpya

Na Mwandishi Wetu, Geita

WACHIMBAJI wadogo wa madini wanawake mkoani Geita wamekabidhiwa leseni tatu za uchimbaji zinazohusisha eneo la takribani ekari 60, hatua inayotarajiwa kuwawezesha kuanza shughuli za uchimbaji rasmi na kuongeza fursa za kiuchumi.

Leseni hizo zimekabidhiwa jana, Oktoba 2, 2026, wakati wa Maonesho ya Tisa ya Kitaifa ya Teknolojia ya Madini yanayoendelea katika Viwanja vya Dkt. Samia Suluhu Hassan mkoani Geita.

Akizungumza baada ya kukabidhiwa kwa leseni hizo, Mwenyekiti wa Chama cha Wachimbaji Madini Mkoa wa Geita (GEWOMA), Asia Masimba, amesema hatua hiyo ni muhimu kwa wachimbaji wadogo ambao kwa muda wamekuwa wakihitaji maeneo ya uchimbaji ili kuendesha shughuli zao kwa utaratibu unaotambulika kisheria.

Masimba amesema wachimbaji hao wamepokea leseni hizo kwa furaha, akieleza kuwa zimeongeza matumaini ya kuanza shughuli za uchimbaji katika maeneo waliyopatiwa na kutumia fursa zilizopo katika sekta ya madini.

Amesema wachimbaji hao wameishukuru Serikali, Mkuu wa Mkoa wa Geita na Rais wa Jamhuri ya Muungano wa Tanzania, Samia Suluhu Hassan, kwa kuwawezesha kupata leseni hizo.

Kwa mujibu wa taarifa zilizotolewa wakati wa tukio hilo, leseni hizo tatu zinahusisha eneo la takribani ekari 60. Wachimbaji hao wamesema wako tayari kuanza maandalizi ya shughuli za uchimbaji mara baada ya kukamilika kwa maonesho hayo.

Hatua hiyo inatarajiwa kuongeza ushiriki wa wachimbaji hao katika uzalishaji wa dhahabu na kuchangia ukuaji wa shughuli zao za kiuchumi.
Hata hivyo, utekelezaji wa fursa hiyo utategemea maandalizi mazuri ya uchimbaji, upatikanaji wa mitaji, matumizi ya teknolojia sahihi pamoja na uzingatiaji wa sheria na kanuni za usalama migodini.

Wachimbaji hao wameeleza matumaini kuwa leseni hizo zitakuwa mwanzo wa hatua mpya ya maendeleo, huku wakitoa shukrani kwa viongozi na wadau waliohusika katika kufanikisha upatikanaji wa maeneo hayo.