SMT, SMZ kushirikiana miradi mikubwa

Na Hadija Bagasha, TimesMajira Online

WIZARA ya Ujenzi na Uchukuzi imesema itaendeleza ushirikiano kwa pande zote mbili za Serikali ya Muungano wa Tanzania (SMT) na Serikali ya Mapinduzi ya Zanzibar (SMZ) bila vikwazo kupitia miradi mikubwa mbalimbali inayoendelea nchini.

Lakini pia serikali kupitia Wizara ya Ujenzi na Uchukuzi (Sekta ya Ujenzi), imesema kuwa itaendelea kubadilishana uzoefu na kuwapatia fursa wataalamu kutoka Serikali ya Mapinduzi ya Zanzibar kuweza kushiriki katika miradi mikubwa ya kimkakati inayotekelezwa nchini kwa lengo la kuwajengea uwezo.

Maafisa hao wa Wizara zinazoshughulikia miundombinu katika Serikali ya Muungano (SMT) na Serikali ya Mapinduzi ya Zanzibar (SMZ) wamekubaliana juu ya mpango wa kurasimisha mfumo wa kuruhusu wataalam kufanya kazi katika upande mwingine wa Muungano.

Hayo yamesemwa na Katibu Mkuu Wizara ya Ujenzi na Uchukuzi kupitia Sekta ya Ujenzi kutoka Tanzania Bara, Mhandisi Joseph Malongo wakati wa kikao cha nne cha ushirikiano kati ya serekali ya SMT na SMZ kilichofanyika mkoani Tanga.

Mhandisi Malongo amesema kuwa, pande zote mbili zimekubali kutengeneza mfumo ambao utawaruhusu vijana waliohitimu kutoka Zanzibar kufanya kazi katika miradi mikubwa ya Tanzania kama Mradi wa Reli ya Standard Gauge na mradi mwingine mkubwa kupata uzoefu.

“Sio kwa vijana waliomaliza tu. Hata wataalam wenye uzoefu watahusika katika mpango wa ubadilishaji kwa sababu pia wanahitaji kuona ni nini mtaalam mwingine anafanya na kutumia uzoefu kama huo katika sehemu zao za kazi,”amesema Malongo.

Amesema, taasisi husika zimeelekezwa na mkutano kutayarisha Mkataba ikiwa Uelewano (MoU) ambayo itasimamia mfumo huo.

“Tunatarajia katika mkutano wetu ujao utakaofanyika Zanzibar Makubaliano hayo yatakuwa tayari kwa hatua ya utekelezaji,” Malongo alisisitiza.

Naye Katibu Mkuu wa Wizara hiyo kutokana Zanzibar, Amour Hamil Bakari alisema mpango huo utakuwa na faida kwa pande zote mbili.

Afisa mwingine kutoka Zanzibar, Mansoor Rashid alisema kuwa kupata uzoefu ni jambo muhimu sana na mpango huo utasaidia wataalam wachanga kujifunza wanachofanya wengine kwa upande wowote.

“Kwa wataalam wenye uzoefu ubadilishaji kama huo utaongeza thamani kwa kile ambacho wanacho tayari,” alisema, akiongeza kuwa Zanzibar ina utajiri wa uzoefu na pia ina miradi mikubwa kama mradi wa bandari iliyopangwa kutekelezwa ya kujifunza.

Kaimu Ofisa Mtendaji Mkuu wa Wakala wa Barabara Zanzibar, Fauzia Hassan alisema kuwa mpango huo utasaidia wakala wa Barabara Zanzibar kwa sababu wataweza kupata uzoefu kutoka kwa Wakala wa Barabara Tanzania (TANROADS) ambao wana uzoefu wa miaka mingi.

“Wakala Zanziba bado ni mchanga. Hii itatuwezesha kupata maendeleo ya haraka kutumia uzoefu kutoka upande huu,”amesema.

Afisa mwingine, Moses Lawrence amesema kuwa, maendeleo ya nchi yanahitaji ushirikiano wa karibu kati ya pande mbili za Muungano na akasema anafurahia maendeleo hayo.