Serikali yamuhakikishia soko la uhakika mafuta ya mawese muwekezaji mkoani Kigoma

Na Mwandishi wetu, TimesMajira Online,Kigoma                   

Naibu Waziri wa Uwekezaji Viwanda na Biashara  Exaud Kigahe (Mb)  amemuhakikishia muwekezaji wa kiwanda cha  TROLLE MEES LE TANZANIA IVS LTD soko la uhakika la mafuta ya mawese baada ya kuanza utekelezaji wa kutatua  changamoto  zilizojitokeza kwenye ziara ya  Waziri Mkuu Kassim Majaliwa. 

 Kigahe ameyasema hayo  mkoani Kigoma  wakati wa kupokea taarifa ya kamati ya kufanya tathimini ya changamaoto zilizojitokeza katika kuongeza thamani ya zao la mchikichi mkoani hapo,ambapo amesema muwekezaji huyo asiwe na wasiwasi kwani soko la uhakika la mafuta hayo lipo.

Akiwa mkoani Kigoma Februari 27 ,2023  Waziri Mkuu alipokea changamoto anuai kutoka kwa muwekezaji wa kiwanda cha kuchakata na kuongeza thamani mafuta ya mawese cha TROLLE MEES LE TANZANIA  IVS LTD kinachomilikiwa na  Abdalah Mwilima.

Aidha changamoto zilizoainishwa na muwekezaji huyo ni pamoja na  upungufu wa  malighafi ya zao la mchikichi,  serikali impatie  eneo la kupanda zao la mchikichi ili kuwa na malighafi ya kutosha ,

Vilevile umeme uliopo eneo la kiwanda kutokuwa na nguvu  (low power) ya kutosha kuendesha mitambo iliyofungwa  kiwandani hapo, hivyo kuomba Tanesco Mkoa wa Kigoma kufunga Transformer kubwa eneo  la mradi.

Pia changamoto nyingine ilikuwa ni  kutopata kiasi chote cha mkopo alichoomba katika benki  ya Maendeleo ya Kilimo (TADB) hivyo kuomba serikali imsaidie kupata mkopo huo kwa wakati.

Kutokana na changamoto hizo,Waziri Mkuu aliagiza Wizara ya Uwekezaji Viwanda na Biashara kupitia taasisi zake ikiwemo SIDO kushughulikia changamoto zote zilizoanishwa na kuzipatia ufumbuzi  kwa wakati.

Hivyo  kutokana na maelekezo hayo Wizara  iliunda kamati ya  kushughulikia changamoto hizo  kupitia taasisi zinazohusika na mnyororo wa  uchakataji wa zao la mchikichi kuanzia hatua ya awali ya uchakataji hadi  kumfikia mlaji ambapo taasisi  zilizohusika katika kamati hiyo ni SIDO,WMA,TEMDO,  CAMARTEC,TIRDO na TBS.

Akizungumza wakati wa kupokea taarifa ya kamati hiyo  Kigahe amemuhakikishia mwekezaji huyo kuwa Wizara imepokea changamoto zote zilizoanishwa na  kuzifanyia kazi kwa haraka sana huku  baadhi zikiwa zimepatiwa ufumbuzi tayari na zingine zikiwa bado  kufanyiwa kazi.

“Nikuhakikishie kuwa changamoto zote  tumeanza kuzifanyia kazi baada ya kupokea maelekezo ya Waziri Mkuu,Benki ya Maendeleo ya Kilimo (TADB) imeshafanyia kazi changamoto yako ya mambo ya  kifedha  limekamilika ,kuhusu Tanessco tumeongea na Meneja wa shirika hilo Mkoa wa Kigoma  changamoto  hiyo inafanyiwa kazi  kwa uharaka zaidi,”amesema Kigahe.

Awali akimkaribisha Naibu Waziri Katibu Mkuu wa Wizara ya Uwekezaji Viwanda na Biashara  Dkt. Hasil Abdallah amemhakikishia Naibu Waziri utekelezaji wa changamoto  zilizoanishwa kwa kusema kuwa,yeye akiwa kama mtendaji mkuu wa Wizara atahakikisha zao la mchikichi linawakwamua wananchi wa Mkoa wa Kigoma kwa kuwa ndilo zao la kimkakati katika mkoa huo.

“Tunataka viwanda vyetu vitumie mafuta ghafi kutoka katika viwanda vyetu kikewemo kiwanda hiki cha TROLLE MEES LE TANZANIA  IVS LTD, tunataka wakulima wanaozalisha mchikichi kutoka Mkoa wa Kigoma wawe na uhakika wa kuzalisha zaidi, sababu soko litakuwepo la uhakika  lakini hata mzalishaji atakuwa na uhakika wa kuzalisha zaidi maana atakuwa na uhakika ya malighafi,”amesema Dkt.Hashill.