NMB yawezesha wakulima kulipwa fidia

Na Mwandishi wetu, TimesMajira Online

Benki ya NMB imesaidia wakulima wa tumbaku zaidi ya 400 mkoani Tabora kulipwa kwa wakati fidia ya hasara waliyopata baada ya mashamba yao kuharibiwa na mvua kubwa za mawe msimu wa 2022/2023. Hundi ya malipo ya madai hayo ya kiasi cha zaidi ya Shilingi milioni 374 kutoka kampuni ya bima ya UAP, imekabidhiwa kwa Mkuu wa Mkoa huo, Balozi Dkt. Batilda Burhani, aliyesema kuwa fidia hizo ni kubwa kuwahi kulipwa wakulima wengi nchini kwa wakati mmoja.

Akizungumza katika hafla ya makabidhiano ya mfano wa hundi wa kiasi hicho cha fedha, Dkt Batilda ameeleza kuwa ushiriki wa NMB katika kulikamilisha hilo kwa haraka kunaifanya kuwa zaidi ya Benki katika kulihudumia Taifa, lakini pia kuendana na adhma ya serikali kuhakikisha wakulima wote nchini wana bima.

Kiongozi huyo ameongeza kuwa, wakulima waliokatia mashamba yao bima dhidi ya majanga walifanya maamuzi sahihi, kwani bima hizo zimekuwa mkombozi wao na sasa wataweza kuendelea na shughuli zao wakiwa na uhakika.

Ameishukuru Benki ya NMB na UAP kwa juhudi za kuhakikisha fidia hii inalipwa kwa haraka si tu zinafanya waathirika kuendelea na kilimo chao, lakini pia zinawapa imani na bima na kuwaonyesha umuhimu wa kuwa na kinga dhidi ya majanga hasa kubima na NMB.

Kwa upande wake, Mkuu wa Kitendo cha Kilimo Biashara wa benki hiyo, Nsolo Mlozi, amesema Benki ya NMB inaunga mkono juhudi za Serilali kuhakikisha kilimo nchini kinakuwa na tija na kuwanufaisha wakulima hivyo wakishirikiana na Mamlaka ya Udhibiti wa Bima (TIRA) wataendelea kuhakikisha wakulima wengi wanapata elimu kuhusu Bima kwani majanga hayatabiriki.

Aidha, amesema mara tu baada ya wakulima hao kufikwa na madhira hayo, Benki ya NMB na Kampuni ya UAP walifanya upembuzi stahiki na tathmini ya kina kuona ni fidia kiasi gani inastahili kwa uharibifu wa mashamba husika na leo wamekabidhi malipo hayo.

Mwakilishi wa UAP, Mariam Hussein, amesema kuwa lengo la kushirikiana na NMB ni kuhakikisha kuwa huduma za bima zinachangia kikamilifu kuendeleza kilimo na kuleta maendeleo ya uchumi nchini.

Amewaasa wakulima ambao hawajakata bima, kutembelea matawi ya NMB nchi nzima kukata bima.