Mwenyekiti wa bodi mfuko wa bima ya afya atoa onyo kali kwa wabadhilifu wa mfuko

Na Esther Macha,Timesmajira Online,Mbeya

MWENYEKITI wa bodi  ya wakurugenzi ya mfuko wa Taifa wa bima ya afya (NHIF) Juma Muhimbi  ameonya baadhi ya wadau wa mfuko  huo  ambao wamekuwa si waaminifu  kutokana na kuhujumu mfuko na kusema kuwa tabia hiyo iachwe mara moja .

Muhimbi amesema hayo jana wakati wa mkutano wa wadau wa  mfuko wa taifa wa bima ya afya  ambao umefanyika Mkoani mbeya katika ukumbi wa mfuko huo uliopo Jijini hapa.

Aidha Mwenyekiti huyo amesema  kuwa  tayari baadhi ya wadau wameshafikishwa kwenye vyombo vya sheria  na kuhukumiwa kufuatia kuhujumu mfuko  huo.

Hata hivyo  Muhimbi ametoa rai kwa wadau wa mfuko  kuacha hiyo tabia  na kwamba bodi yake  wataendelea kupiga vita kwa nguvu zote  ubadhilifu  wa mfuko huo  na kwamba kila mtu ana wajibu wa kuwa na nia moja  katika  kuhakikisha  mfuko huo unastawi ili watu wao  waendelee kufaidika  sasa na vizazi vijavyo.

“Ndugu zangu kuwepo kwa mfuko huu ni manufaa kwa pande zote wakiwemo wanachama  na watoa huduma , hivyo itakuwa  ni hasara  kwetu  sote  endapo tutaachia  mfuko huu ukafa kwa sababu  ya ubadhilifu,tuulinde mfuko ili utulinde”amesema Mwenyekiti huyo wa bodi.

Akifafanua zaidi Muhimbi alisema kwamba hivi sasa serikali  ya awamu ya sita chini  ya uongozi wa Rais Samia Suluhu Hassan ni kujenga Tanzania  ambayo wananchi wake wana  uhakika wa kupata huduma  za matibabu  na  ndio maana  ya kuweka  katika kutekeleza suala la bima ya afya  kwa wote.

Akielezea zaidi Mwenyekiti wa bodi huyo , alisema kuwa mpaka sasa  asilimia nane (8) ya watanzania  ndio wananufaika na huduma za NHIF na kwamba asilimia hiyo bado ni ndogo  hasa ukizingatia umuhimu wa kuwa na bima ya afya  kwa wananchi .

Naye Mkurugenzi Mkuu wa mfuko wa bima ya afya Taifa (NHIF) Bernard Konga amesema  kuwa mfuko huo unakuja na mikakati ya  kuongeza wanachama  zaidi  wa kizazi cha kati ili kuhakikisha kuwa wanajumuishwa kwenye huduma ya afya .

Kwa upande Mwenyekiti wa baraza  la wadhamini la wawekezaji wa elimu  Tanzania (TAPIE)Mahmoud Mringo ametoa  ushauri kwa  uongozi wa mfuko wa bima ya afya kuwafikiria wagonjwa wa  magonjwa ya kudumu  kuwepo kwenye mfuko huo  kutokana na matibabu yake kuwa gharama kubwa.