Mwenyekiti ACT-Wazalendo: “Umoja wa Wazanzibari Ni Mafanikio Makubwa”

Na Mwandishi wetu,Timesmajira

Mwenyekiti wa Chama cha ACT-Wazalendo,Othman Masoud Othman, amesema kuwa moja ya mafanikio makubwa katika mchakato wa uchaguzi wa 2025 ni kuwepo umoja mkubwa miongoni mwa Wazanzibari, licha ya mazingira magumu yaliyojitokeza.

Akizungumza katika mikutano tofauti huko Dunga Wilaya ya Kati na Makunduchi Kusini Unguja, Othman alikutana na wagombea wa ubunge, uwakilishi, udiwani, mawakala na viongozi mbalimbali wa chama hicho kwa lengo la kutoa shukrani na kueleza mwelekeo wa chama baada ya uchaguzi.

Asema uchaguzi ulikumbwa na udanganyifu mkubwa

Othman amesema kitendo cha Wazanzibari kuungana kiliwashtua washindani wao na kusababisha “vitendo vya kuhujumu uchaguzi,” akibainisha kwamba chama tawala kilifanya udanganyifu uliodhihirika wazi kwa dunia nzima.

“Ni jambo la aibu kwa namna uchaguzi huu ulivyogeuzwa kuwa fedheha kwa Zanzibar. Dunia imeona jinsi dola, askari na vikosi vilivyotumika kuuteka nyara uchaguzi,” amesema.

Ameongeza kuwa ACT-Wazalendo ilishatoa onyo mapema kwa Tume ya Uchaguzi kuhusu dalili za hujuma, lakini tahadhari hizo hazikutiliwa maanani.

“CCM wanajua namba zao, lakini hawajui hesabu”

Akimtumia mfano mkali kuonyesha mazingira ya uchaguzi, Othman amefananisha hatua za CCM na “mtu aliyepanda ngazi huku suruali yake ikiwa imepasuka,” akimaanisha kuwa udanganyifu hujifichua hata ukifichwa vipi.

ACT-Wazalendo: Hatutajadili GNU bila haki kwanza

Licha ya kukiri kupokea barua ya kuombwa kuwasilisha jina la Makamu wa Kwanza wa Rais kwa ajili ya Serikali ya Umoja wa Kitaifa, Mhe. Othman alisema chama chake hakiwezi kujadili suala hilo kwa kuwa “hakukuwa na uchaguzi Zanzibar.”

“Hatutaingia kwenye mazungumzo ya kujiunga au kutokujiunga kwenye serikali ya umoja wa kitaifa wakati Wazanzibari wamedhulumiwa haki yao. Kwanza tunahitaji mazingira ya uchaguzi huru na wa kweli,” alisisitiza.

Asema mara ya mwisho chama kilivumilia kwa maslahi ya nchi

Alikumbusha kuwa katika awamu iliyopita, licha ya maafa na madhila ya uchaguzi, chama hicho kilikubali kuingia kwenye Serikali ya Umoja wa Kitaifa kwa matumaini ya kuleta marekebisho — lakini hakuna kilichotekelezwa.

Ismail Jussa: “Wengi wa CCM kutopiga kura ni ishara ya kutuunga mkono”

Makamu Mwenyekiti wa chama hicho, Ismail Jussa, alisema kitendo cha baadhi ya wanachama wa CCM kutoshiriki kupiga kura ni ujumbe kuwa wameungana na wananchi wanaotaka haki na mabadiliko.

Alisema maelekezo ya chama kwa wanachama wake kukaa kimya wakati wa matukio ya kutia hofu yalikuwa ya kulinda amani ya nchi.

Mashuhuda: “Hakukuwa na uchaguzi, ilikuwa ni ghiliba na vitisho”

Mashuhuda wa uchaguzi katika majimbo matano ya Mkoa wa Kusini Unguja waliiambia uongozi wa chama hicho kuwa uchaguzi huo haukufuata sheria wala taratibu, wakieleza tukio la mawakala na wagombea kutolewa nje kwa nguvu na pia masanduku kuhamishwa bila usimamizi.

Walisema walishuhudia vijana wakipelekwa vituoni kwa magari mbalimbali na kupiga kura mara kadhaa bila uthibiti.