ETDCO yakamilisha mradi wa kusambaza Umeme Masasi-Newala

Na.Mwandishi wetu,Timesmajira

Waziri wa Nishati, Deogratius John Ndejembi, amezindua mradi wa TANESCO wa laini maalum ya Kusafirisha Umeme wa msongo wa kilovolti 33 kutoka Wilaya ya Masasi hadi Newala, Mkoa wa Mtwara uliotekelezwa na Kampuni ya Ujenzi na Ukarabati wa Miundombinu ya Usafirishaji na Usambazaji wa Umeme (ETDCO)

Akizungumza Mkoani Mtwara katika hafla ya uzinduzi wa mradi huoNdejembi amesema Serikali ya Awamu ya Sita inayoongozwa na Rais Dkt. Samia Suluhu Hassan imejipanga kuhakikisha Wananchi wa Mikoa ya Mtwara na Lindi wanapata umeme wa uhakika kupitia utekelezaji wa miradi mbalimbali ya umeme.

Aidha, amempongeza Mkandarasi ETDCO kwa kukamilisha mradi huo kabla ya muda uliopangwa na kuwataka wakandarasi wote wanaotekeleza miradi ya umeme kufanya kazi kwa weledi na kuzingatia muda wa mikataba ili kufanikisha azma ya Serikali ya kuwapatia wananchi umeme wa uhakika.

Katibu Mkuu wa Wizara ya Nishati anayeshughulikia masuala ya Umeme na Nishati Jadidifu, Mhandisi Felchesmi Mramba, ameipongeza ETDCO kwa kuendelea kutekeleza miradi ya umeme kwa wakati na ufanisi mkubwa.

Mhandisi Mramba amesema Serikali inaendelea kuimarisha upatikanaji wa umeme katika Mikoa ya Lindi na Mtwara kupitia utekelezaji wa miradi mbalimbali, ikiwemo mradi wa laini ya Kusafirisha umeme wa Masasi – Mahumbika wa msongo wa kilovolti 220, ili kuhakikisha wananchi wanapata umeme wa uhakika.

Naye, Mkurugenzi Mtendaji wa TANESCO, Lazaro Twange, amesema mradi huo wa laini ya msongo wa kilovolti 33 wenye urefu wa takribani kilomita 76 utaboresha upatikanaji wa umeme katika Wilaya ya Newala na kupunguza changamoto ya kukatika kwa umeme.

Ameongeza kuwa TANESCO inatarajia kutekeleza mradi wa shilingi bilioni 5.27 wa ujenzi wa kituo kipya cha kupooza umeme (Switching Station) Wilayani Newala ili kuimarisha zaidi huduma ya umeme.

Kwa upande wake Kaimu Meneja Mkuu Kampuni ya ETDCO, Mhandisi Richard Mwanja, amesema Kampuni imefanikiwa kukamilisha mradi huo wenye urefu wa takribani kilomita 76 ndani ya miezi saba badala ya miezi 12 iliyokuwa imeainishwa kwenye mkataba.

Akizungumza kwa niaba ya wananchi Mbunge wa Jimbo la Newala Vijijini, Dkt. Yahya Nawanda, ameishukuru Serikali kwa kutekeleza mradi huo wenye thamani ya takribani shilingi bilioni 4.6, akisema utachochea ukuaji wa shughuli za kiuchumi kupitia Sekta za Viwanda, Kilimo na Ajira katika Wilaya hiyo.

Nao wakazi wa Wilaya ya Newala wameishukuru Serikali kwa kuwapelekea mradi huo, wakieleza kuwa utaimarisha shughuli za uzalishaji, kukuza uchumi na kuharakisha maendeleo ya wananchi.