Dkt. Kikwete aipongeza Zanzibar, azindua Kituo cha Afya Kizimkazi

Na Mwandishi Wetu, TimesMajira Online, Zanizibar

RAIS Mstaafu wa Awamu ya Nne wa Jamhuri ya Muungano wa Tanzania, Dkt. Jakaya Mrisho Kikwete, amepongeza maendeleo makubwa yanayoendelea visiwani Zanzibar chini ya uongozi wa Rais wa Zanzibar, Dkt. Hussein Ali Mwinyi.

Katika hafla ya uzinduzi wa Kituo kipya cha Afya Kizimkazi, iliyofanyika jana Ijumaa katika Wilaya ya Kusini Unguja, Dkt. Kikwete alisisitiza umuhimu wa mafanikio haya, ambayo yanadhihirika kwa kila mtu, na kuwataka wananchi kupongeza na kuenzi juhudi hizo.

Kituo hicho cha kisasa kinajumuisha vifaa vya uchunguzi na matibabu, na kinatarajiwa kuhudumia zaidi ya watu 13,000 kutoka shehia za Kibuteni, Kizimkazi Mkunguni, na Kizimkazi Dimbani, pamoja na maeneo jirani kama Muyuni. Katika mwaka 2024 pekee, watu 12,389 walihudumiwa kituoni hapo, ikiwa ni pamoja na wanaume 5,068 na wanawake 7,325.

Uzinduzi wa kituo hiki ni sehemu ya sherehe za kuadhimisha miaka 61 ya Mapinduzi Matukufu ya Zanzibar, ambapo kilele chake kitakuwa tarehe 12 Januari 2025. Dkt. Kikwete alikumbusha umuhimu wa kutunza majengo na vifaa vya kituo hicho ili huduma hizi za afya ziweze kudumu, akisema, “Tukitunze kituo kidumu; ni chetu, ni mali yetu, ni kwa ajili yetu.”

Hafla hiyo ilihudhuriwa na mkewe, Mama Salma Kikwete, Mbunge wa Mchinga, pamoja na viongozi wengine wa kitaifa na mamia ya wananchi wenye furaha.

Kituo cha Afya Kizimkazi kimejengwa kwa ushirikiano wa wadau mbalimbali, wakiwemo Samia Foundation, Foundation for Humanitarian Initiatives ya Umoja wa Falme za Kiarabu, Benki ya NBC, pamoja na Serikali ya Mapinduzi ya Zanzibar na Serikali ya Jamhuri ya Muungano wa Tanzania. Dkt. Kikwete alisisitiza kwamba ushirikiano huu ni mfano mzuri wa juhudi za maendeleo na aliwataka Wizara ya Afya kuhakikisha upatikanaji wa wafanyakazi wa kutosha ili huduma ziwe endelevu.

Hotuba yake ilihitimishwa kwa kaulimbiu ya “Amani, Umoja na Mshikamano kwa Maendeleo Yetu – Mapinduzi Daima,” kabla ya kutangaza rasmi ufunguzi wa Kituo cha Afya Kizimkazi. Wananchi walionyesha furaha yao, wakisema kuwa kituo hicho ni zawadi kubwa kwa maisha yao, na kuashiria mwanzo wa zama mpya za huduma za afya katika eneo hilo.

Kwa uzinduzi wa miradi kama hii, Serikali ya Mapinduzi ya Zanzibar inaendelea kuthibitisha dhamira yake ya kuleta maendeleo halisi kwa wananchi wake.

Sehemu ya wodi za Kituo kipya cha Afya Kizimkazi, katika Wilaya ya Kusini Unguja

Muonekano wa ndani wa Kituo kipya cha Afya Kizimkazi, katika Wilaya ya Kusini Unguja