CRDB yazindua matawi Majimoto, Ilula kuwahudumia wananchi

Na Mwandishi Wetu, TimesMajira Online

KATIKA juhudi za kuimarisha huduma za kifedha nchini, Benki ya CRDB imezindua matawi mawili mapya katika Halmashauri ya Mpimbwe mkoani Katavi na Wilaya ya Kilolo mkoani Iringa. Uzinduzi huo unaleta idadi ya matawi ya benki hiyo nchini kote kufikia zaidi ya 260, hivyo kuifanya kuwa benki yenye mtandao mkubwa zaidi wa huduma.

Akizindua tawi la Majimoto, Naibu Waziri wa Ardhi, Nyumba na Maendeleo ya Makazi, Mheshimiwa Geophrey Mizengo Pinda, alisisitiza umuhimu wa benki hiyo kuwafikia wananchi wa maeneo ya mbali, akisema, “Nazipongeza sana juhudi zenu za kuwafuata wananchi mahali walipo kwani hii ni ishara tosha kuwa Benki ya CRDB imejipanga vilivyo kuunga mkono jitihada za Serikali kufanikisha mipango ya kuwajumuisha Watanzania wengi katika mfumo rasmi wa huduma za fedha.”

Pinda aliongeza kuwa, fedha ni kichocheo muhimu cha maendeleo ya taifa, na ukuaji wa sekta ya fedha unapaswa kuimarishwa ili kusaidia kupunguza umaskini. Aliwahimiza wahudumu wa benki hiyo kuendelea kutoa elimu ya kifedha kwa wananchi ili kuwasaidia kukuza biashara zao.

Naye Mkuu wa Mkoa wa Iringa, Mheshimiwa Peter Serukamba, alisisitiza kwamba wananchi wa Iringa wanahitaji huduma za benki kwa ajili ya usalama wa fedha zao, akitaja kuwa mkoa huo unachangia kwa kiasi kikubwa chakula cha taifa. “Ujio wa Benki ya CRDB hapa Ilula utakuwa na mchango mkubwa kwa uchumi wa mwananchi mmojammoja na halmashauri pia,” alisema.

Mkurugenzi wa Wateja wa Awali na wa Kati wa Benki ya CRDB, Bonaventura Paul, alieleza kwamba mtandao wa huduma za benki hiyo umekua kwa kiasi kikubwa kutoka matawi 19 mwaka 1996 hadi zaidi ya 260 sasa. “Tutaendelea kusogeza huduma zetu kwa wananchi kadri itakavyoonekana inahitajika,” alisema Paul.

Benki ya CRDB pia imetangaza kuwa inatoa huduma kupitia mawakala 171 mkoani Katavi na 686 mkoani Iringa, wakihakikisha kuwa huduma za kifedha zinapatikana karibu na wananchi. Aidha, benki hiyo ilikabidhi mifuko 50 ya saruji kwa ajili ya ujenzi wa mabweni ya wasichana katika Shule ya Sekondari Kiheka iliyopo Ilula, pamoja na ahadi ya kutoa shilingi milioni moja kwa ajili ya kugharimia ujenzi.

Hizi ni hatua muhimu katika kuhakikisha huduma za kifedha zinafikika kwa urahisi na kuimarisha maendeleo ya kiuchumi katika maeneo haya mabweni ya wasichana katika Shule ya Sekondari Kiheka iliyopo Ilula, pamoja na ahadi ya kutoa shilingi milioni moja kwa ajili ya kugharimia ujenzi.

Hizi ni hatua muhimu katika kuhakikisha huduma za kifedha zinafikika kwa urahisi na kuimarisha maendeleo ya kiuchumi katika maeneo haya.