Benki ya Exim Yazindua Huduma Mpya ya ‘Elite Banking’ kwa Wateja wa Daraja la Juu

Na Mwandishi Wetu, TimesMajira Online, Dar es Salaam

BENKI ya Exim Tanzania imeandika historia mpya katika sekta ya huduma za kifedha nchini kwa kuzindua huduma yake ya kipekee iitwayo Elite Banking, inayolenga kuwahudumia wateja wa daraja la juu kwa ufanisi zaidi, teknolojia ya kisasa na huduma binafsi zilizo bora na za kiubunifu.

Uzinduzi wa huduma hiyo umefanyika katika hafla ya kuvutia iliyofanyika katika Hoteli ya Serena, jijini Dar es Salaam, na kuhudhuriwa na wadau muhimu wakiwemo wateja wakubwa wa benki hiyo, wajumbe wa bodi na washirika wa kimkakati, akiwemo mshirika mkuu Mastercard.

Akizungumza katika hafla hiyo, Afisa Mtendaji Mkuu wa Exim Bank Tanzania, Jaffari Matundu, alisema huduma ya Elite Banking ni hatua ya kimkakati ya benki hiyo katika kuweka mbele mahitaji ya wateja wake wa kipekee.

“Elite Banking si tu huduma mpya – ni tafsiri mpya ya upekee. Tunataka wateja wetu wajisikie kuwa kila huduma ni ya kwao binafsi, iliyojengwa kwa ajili yao, na inayovuka matarajio yao,” alisema Matundu.

Huduma hii inajengwa juu ya msingi wa ‘Preferred Banking’ iliyoanzishwa mwaka 2016, lakini sasa imeboreshwa na kupanuliwa zaidi ili kukidhi mahitaji ya wateja wa kisasa, hususan wale wanaohitaji huduma za kifedha za haraka, salama na zenye hadhi ya juu.

Kwa upande wake, Mkuu wa Kitengo cha Huduma za Rejareja Exim Bank, Andrew Lyimo, alieleza kuwa Elite Banking ni jukwaa linalowapa wateja upatikanaji wa huduma bora zaidi wakiwa mahali popote, kupitia vituo maalum vya huduma kwenye matawi ya benki, huduma ya DragonPass kwa wasafiri wa kimataifa, pamoja na suluhisho za kifedha zenye thamani ya juu.

“Tunawaletea huduma za kidijitali na faida zisizopatikana mahali pengine, ili kuwafanya wateja wetu wawe huru zaidi kifedha, huku wakifurahia maisha kwa ubora unaostahili,” alisema Lyimo.

Kilele cha hafla hiyo kilikuwa ni uzinduzi rasmi wa kadi za Mastercard World, ambazo zinajumuisha:

• Mastercard World Debit Card (TZS)
• Mastercard World Debit Card (USD)
• Mastercard World Credit Card

Kadi hizi zimebuniwa kwa kushirikiana na Mastercard, na zinampa mteja faida lukuki kama vile kuingia maeneo ya mapumziko ya kifahari kwenye viwanja vya ndege duniani, huduma za usafiri wa hali ya juu, bima ya safari inayoangazia matukio yote, pamoja na ulinzi wa ununuzi na zawadi maalum za maisha ya kila siku.

Mwakilishi wa Mastercard kwa Tanzania, Burundi na Djibouti, Elsie Wachira-Kaguru, alisifu ushirikiano huo na kusema:

“Tunajivunia kushirikiana na Exim Bank kufungua milango ya fursa kwa wateja wake kupitia kadi hizi. Ni hatua ya kuendeleza mapinduzi ya kidijitali katika huduma za kifedha nchini Tanzania.”

Kwa ujumla, uzinduzi wa Elite Banking unaashiria mwanzo mpya wa huduma bora zaidi kutoka Exim Bank – benki inayotambua umuhimu wa kuwahudumia wateja wake kwa weledi, uaminifu na teknolojia ya hali ya juu. Ni hatua nyingine kuelekea benki ya kesho inayoweka mteja mbele zaidi.

Exim Bank Tanzania ni mojawapo ya benki zinazoongoza kwa ubunifu wa huduma nchini, ikiwa na mtandao mpana unaovuka mipaka ya Tanzania. Benki hii inaendelea kuboresha maisha ya wateja wake kupitia huduma za kisasa na malengo ya kuhimiza ujumuishwaji wa kifedha.