Rais Samia kuongoza kikao cha Kitaifa kujadili mwelekeo wa Tanzania baada ya COP30

Na Martha Fatael, TimesmajiraOnline

KESHO  Disemba 17, 2025 , Rais wa Jamhuri ya Muungano wa Tanzania, Dar es Salaam, Dkt. Samia Suluhu Hassan, anatarajiwa kuongoza kikao maalum cha wadau wa mazingira na maendeleo kujadili mwelekeo wa nchi katika utekelezaji wa maamuzi ya baada ya COP30.

Kikao hicho kimeelezwa kuwa cha kimkakati katika kuunganisha ahadi za kimataifa na vipaumbele vya taifa, hususan katika kukabiliana na athari za mabadiliko ya tabianchi na kuchochea maendeleo endelevu.

Msimamo wa serikali

Mshauri wa Rais kuhusu Masuala ya Mazingira na Mwenyekiti wa Kundi la Majadiliano la Afrika (AGN), Dar es Salaam, Dkt. Richard Muyungi, amesema kikao hicho ni fursa ya kutafsiri maamuzi ya COP30 kuwa hatua za utekelezaji zinazoonekana kwa wananchi.

“Baada ya COP30, jambo la msingi si tena ahadi bali utekelezaji. Tunahitaji mifumo ya kitaifa itakayopima matokeo, kuonyesha nani anawajibika na kuhakikisha fedha za tabianchi zinafika kwenye jamii zinazohitaji zaidi.”amesema Dkt Mayungi

Amesema Tanzania inapaswa kuimarisha mifumo ya uwajibikaji ili kuhakikisha ahadi za kimataifa zinageuka kuwa mipango yenye tija katika ngazi ya taifa na serikali za mitaa.

Sauti za asasi za kiraia

Mkurugenzi Mtendaji wa Human Dignity and Environmental Care Foundation (HuDEFO), Dar es Salaam, Sara Pima, amesema mjadala wa kesho unapaswa kuzingatia kwa makini sauti za jamii zilizo mstari wa mbele kukabiliana na athari za mabadiliko ya tabianchi.

“Jamii haziwezi kuwa watazamaji wa maamuzi yanayohusu maisha yao. Kikao hiki kiwe mwanzo wa kuhusisha kwa dhati wanawake, vijana na makundi yaliyo pembezoni ili hatua za baada ya COP30 ziwe na haki, usawa na matokeo ya kudumu.”amesema Pima

Amesema wanawake, vijana na jamii za vijijini bado hawapati nafasi ya kutosha katika upangaji na utekelezaji wa miradi ya tabianchi, hali inayodhoofisha ufanisi wa maamuzi yanayofikiwa katika mikutano ya kimataifa.

Sauti za wananchi wa Moshi

Wakizungumza kwa nyakati tofauti, wananchi wa Moshi, Mkoa wa Kilimanjaro, wameeleza matarajio yao juu ya kikao hicho. Mfanyabiashara mdogo, Moshi Mjini, Rehema Mallya, amesema maamuzi ya COP30 yasiletwe kama sera za juu pekee bali yashuke hadi ngazi ya kaya.

Amesema changamoto za maji, afya na usimamizi wa taka zimeongezeka kutokana na mabadiliko ya tabianchi, hivyo anatarajia serikali itaweka fedha na mifumo ya ufuatiliaji itakayogusa maisha ya wananchi moja kwa moja.

Mkazi mwingine, Moshi Vijijini, Joseph Mushi, amesema wakulima wadogo wameathirika na mabadiliko ya misimu na uzalishaji umepungua. Amesema kikao cha kesho kinapaswa kuhakikisha kunakuwepo mpango wa elimu ya kilimo kinachostahimili mabadiliko ya tabianchi, pembejeo na mikopo nafuu kwa wakulima, ili maamuzi ya kimataifa yawe na mchango halisi kwa uchumi wa wananchi.

Maoni ya wadau wengine

Kwa upande wa wadau wengine, Mkurugenzi wa Shirika la Mazingira la Jamii, Arusha, John Mollel, amesema kikao hicho kitapima dhamira ya nchi katika uwazi na uwajibikaji wa matumizi ya fedha za tabianchi na kuwa bila uwazi, miradi mingi ya mazingira itaendelea kutekelezwa bila kufikia walengwa.

Naye Mchambuzi wa Uchumi wa Mazingira, Dar es Salaam, Dkt. Emmanuel Kweka, amesema mafanikio ya baada ya COP30 yatategemea uwezo wa nchi kuoanisha malengo ya tabianchi na ajenda ya ukuaji wa uchumi, hususan katika nishati safi, usafiri na viwanda vidogo.

Kwa ujumla, kikao cha kesho kinatarajiwa kutoa mwelekeo wa pamoja kuhusu vipaumbele vya utekelezaji wa maamuzi ya COP30, mgawanyo wa majukumu kwa taasisi husika na mfumo wa kufuatilia matokeo, huku wananchi wakisubiri kuona ahadi za kimataifa zikigeuka kuwa mabadiliko yanayoonekana katika maisha yao ya kila siku.