TMA yatoa taarifa ya kimbunga Jobo kaskazini mwa kisiwa cha Madagascar

Na Penina Malundo,timesmajira,Online

MAMLAKA  ya Hali ya Hewa Tanzania (TMA) imetoa  taarifa kuhusu kimbunga Jobo kaskazini mwa kisiwa cha Madagascar.

Taarifa iliyotolewa na Mamlaka hiyo kwa vyombo vya habari leo,imesema kumejitokeza mgandamizo mdogo wa hewa ambao umefikia kiwango cha kimbunga hafifu kwa jina Jobo.

Imesema  Kimbunga hicho kipo kaskazini mwa Kisiwa cha Madagascar katika Bahari ya Hindi umbali wa Kilometa 930 na kilometa 1030 kutoka pwani ya Lindi na Mtwara.

Aidha, uwepo wa kimbunga hicho unatarajiwa kusababisha ongezeko la upepo na mawimbi katika bahari ya Hindi hususani katika Pwani ya mwambao wa mikoa ya Mtwara na Lindi. “Mamlaka inaendelea kufuatiliia mwenendo na mwelekeo wa kimbunga Jobo kwa kuzingatia mifumo mingine ya hali ya hewa iliyo jirani zaidi na kimbunga hicho ambayo inaweza kubadili nguvu na mwelekeo wa kimbunga Jobo katika wakati ujao,”imesema sehemu ya taarifa hiyo

Imesema Wananchi waendelee kuzingatia tahadhari ya upepo na mawimbi iliyotolewa na Mamlaka ya Hali ya Hewa Tanzania katika maeneo husika.