RC Mara awataka watumishi wa Serikali mkoani humo kupokea simu za wananchi

Fresha Kinasa,TimesMajiraOnline,Mara.

MKUU wa Mkoa wa Mara Kanali Evans Mtambi amewataka Watumishi wote wa  serikali mkoani humo wawe tayari kupokea simu wanapopigiwa na Wananchi kutaka ufafanuzi na ufunguzi wa shida zao na pia wawatumikie  Wananchi kwa moyo wa dhati.

Kanali Mtambi ameyasema hayo Januari 29, 2025 wakati akizungumza na Viongozi wa Mashirika mbalimbali yasiyokuwa ya Kiserikali Mkoani humo.

Kanali Mtambi amesema kuwa,Viongozi hao hawapaswi kujikweza pindi wanapotakiwa kutoa huduma kwa Wananchi kwani kufanya hivyo ni kurudisha Nyuma juhudi za serikali za kutatua changamoto za Wananchi kwa shabaha ya  kuchochea Kasi ya  maendeleo.

“Watumishi muwe  tayari kupokea simu na kusaidia Wananchi katika idara zenu, ninyi mlioko  serikalini ni Watumishi wa watu acheni  tabia ya majivuno muwe na moyo wa kuhudumia  Wananchi wanapowafikia kwa upendo na moyo wote mkitambua kwamba dhamana mliyopewa.  ni muhimu katika kusukuma mbele gurudumu la Maendeleo.”amesema Kanali Mtambi.

Pia, ametoa wito kwa Mashirika yote yasiyokuwa ya Kiserikali (NGOs) Mkoani humo kuendelea kufanya kazi kwa kufuata Sheria na taratibu zote za nchi  na Kutanguliza mbele uzalendo katika utekelezaji wa majukumu yao ya kuwahudumia Wananchi wa Mkoa huo.

“Serikali ya Mkoa inatambua kwa dhati mchango wenu katika kuwahudumia Wananchi,  baadhi ya miradi yenu mnayoifanya  imeendelea  Kusaidia kupunguza vitendo vya Ukatili wa Kijinsia ndani ya Mkoa.  Niwaombe mzidi Kutanguliza mbele uzalendo na kufanya kazi kwa uadilifu na kufuata Sheria na taratibu zote ambazo zinatakiwa.”amesema Kanali Evans  Mtambi.