CCM : Wapinzani kushindwa ni lazima jimbo la Muhambwe na Buhigwe

Na Mwandishi  Wetu,timesmajira, Kigoma 

KATIBU  wa Halmashauri Kuu ya Chama cha Mapinduzi (CCM)Taifa, Idara ya   itikadi na uenezi CCM Shaka Hamdu Shaka ameufananisha uchaguzi  mdogo wa majimbo ya Muhambwe na Buhigwe kama vita vya Kagera  vilivyomgaragaza na kumuondoa Nduli Idd Amin  Dada na majeshi yake ndani ya  mipaka ya Tanzania mwaka 1978/79,ndivyo watakavyowagaragaza wapinzani wao.

Pia amesema, Chama kimeweka mpango katika majimbo kuhakikisha wanashinda kwa haki, amani na kwa ushindani  wa kidemokrasia  .

Shaka ameeleza hayo jana wilayani Kibondo  mkoani Kigoma, wakati wa Uzinduzi  wa Mkutano  wa hadhara wa Kampeni mbele ya mgeni  rasmi Mjumbe wa kamati kuu ya  CCM,Majaliwa Kasim Majaliwa.

Amesema CCM ni waumini wa demokrasia shirikishi  hivyo wameshaingia kwenye  uwanja wa mapambano hawatarudi nyuma hadi ushindi utakapopatikana.

“Ni lazima adui apigwe bila huruma na kuhakikisha majeshi yao yanafukuzwa hadi nje ya karibu na mipaka  ya DR Congo, Mwaka 1978 nchi yetu ilivamiwa na Majeshi ya Uganda tukalazimika kuyachakaza,”amesema na kuongeza

“ Kipigo kama kile kitawapata tena watani  wetu katika majimbo ya  Muhambwe na Buhingwe, kwani sababu ya kuwapiga watani zipo, nia na uwezo  wa kuwatandika upo hivyo kazi  iliobaki ni moja tu ya kuwashinda kwenye chaguzi zote mbili   kwenye majimbo hayo,”amesema

Amesema katika uchaguzi huo watashinda kwa mbinu za matumizi ya  sera na sayansi ya siasa hatimaye kuwaacha mbali  washindani wao kwani baadhi ya vyama vinashiriki  uchaguzi huu kwa lengo la kusindikiza  Chama Cha Mapinduzi na wagombea wake.

“Tumebeba baadhi ya mitambo  muhimu inayoweza kupiga  katika masafa mafupi na marefu,kazi ilio mbele yetu ni kuwatandika bila huruma watani wetu ili kuwafundisha nidhamu ya siasa ,” Amesema 

Aidha amesema kwa kufuata katiba ya chama chao kimefanya vikao vyake kuanzia ngazi za chini hadi  juu vya  chama na kuyapitisha majina ya wagombea walioingia kuwa  sifa na walioshiriki kwenye  mchakato huo wanaendelea kutoa ushirikiano kwa wenzao. 

“CCM si chama cha nongwa au mizengwe au kuwekeana mifundo na vinyongo, Uchaguzi ndani ya chama unapomalizika kila mwanachama hutakiwa kuheshimu maamuzi kwani  Jeshi letu ni moja hivyo kila askari hutakiwa kwenda mstari  wa mbele ,”ameeleza Shaka