STAMICO, FDH Tanzania zapanua fursa kwa watu wenye ulemavu

Na Joyce Kasiki, Geita

FURSA za kiuchumi na kijamii kwa watu wenye ulemavu zimeendelea kupewa msukumo kupitia ushirikiano kati ya Shirika la Maendeleo ya Huduma za Fedha (FDH Tanzania) na Shirika la Madini la Taifa (STAMICO).

Ushirikiano huo umeelezwa kuwa sehemu ya jitihada za kuwaunganisha watu wenye ulemavu na makundi mengine katika jamii na fursa zinazoweza kuwawezesha kujitegemea kiuchumi.

Akizungumza wakati wa Wiki ya Madini mkoani Geita, Mkurugenzi wa FDH Tanzania, Michael Salali, amesema ushirikiano na STAMICO umewezesha wananchi kupata elimu na mwongozo kuhusu fursa zinazopatikana katika sekta mbalimbali.

Salali amezipongeza juhudi za STAMICO chini ya uongozi wa Mkurugenzi wake, Dkt. Venance Mwasse, kwa kuweka msisitizo katika kuwawezesha watu wenye ulemavu kushiriki katika shughuli za kiuchumi.

Amesema elimu inayotolewa kupitia ushirikiano huo inalenga kuwasaidia wananchi, hususan watu wenye ulemavu, kutambua fursa zilizopo na kuzitumia katika kuboresha maisha yao.

STAMICO Yatoa Elimu Kuhusu Mkaa Mbadala
Katika Wiki ya Madini, STAMICO pia imeendelea kutambulisha mkaa mbadala unaojulikana kama Rafiki Briquette, ikiwa ni sehemu ya juhudi za kuhamasisha matumizi ya nishati mbadala na safi.

FDH Tanzania imesema wataalamu waliopo katika banda la STAMICO wako tayari kutoa elimu kwa wananchi kuhusu matumizi ya bidhaa hiyo pamoja na fursa za kiuchumi zinazoweza kutokana na uzalishaji na matumizi ya nishati mbadala.

Salali amewahimiza watu wenye ulemavu kutembelea banda la STAMICO na kuwasiliana na wataalamu wa FDH Tanzania ili kupata elimu na ushauri kuhusu fursa zinazoweza kuwasaidia kukabiliana na changamoto za kiuchumi.

Wito wa Kuwawezesha Watu Wenye Ulemavu
Salali pia ametoa wito kwa taasisi mbalimbali na jamii kwa ujumla kuendelea kuweka mazingira wezeshi kwa watu wenye ulemavu ili waweze kushiriki kikamilifu katika shughuli za kijamii na kiuchumi.

“Watu wenye ulemavu wanahitaji fursa na mazingira wezeshi ili waweze kutumia uwezo wao na kushiriki kikamilifu katika maendeleo ya jamii,” amesema.

Kwa upande wake, FDH Tanzania imesema itaendelea kushirikiana na wadau mbalimbali katika kuhakikisha watu wenye ulemavu na makundi mengine wanapata taarifa, elimu na fursa zinazoweza kuwawezesha kujikwamua kiuchumi.

Salali pia ametoa shukrani kwa Rais Dkt. Samia Suluhu Hassan kwa msisitizo wake katika uwezeshaji wa wananchi na matumizi ya nishati safi, akisema hatua hizo zinaendelea kufungua nafasi kwa taasisi mbalimbali kushirikiana katika kuleta manufaa kwa jamii.